Tropismoak 18
| ←Tropismoak 17 | Tropismoak (2021) , translated by Luis Alfonso Lopez Labrador |
Tropismoak 19→ |
XVIII
Londresko inguruetan da, perkalezko errezelak dituen basetxe batean, belardi txikiarekin atze aldean, egutera eta euritan bustia.
Apartamentuko leihate handia, glizinez inguratua, belardi honetara irekitzen da.
Katu bat eserita dago zeharo tente, begi itxiak, harri beroaren gainean.
Ile zuriko andereño bat, masail arrosak apur bat more, ate aurrean ingeles aldizkari bat irakurtzen ari da.
Hor dago eserita, guztiz zurrun, guztiz itxuroso, guztiz ziur beraz eta besteez, haren unibertso txikian sendoki kokatua. Minutu batzuen buruan terako txilinak joko duela badaki.
Behealdean, Ada sukaldaria, hule zuriz estalitako mahaiaren aurrean, barazkiak garbitzen ari da. Haren aurpegia geldirik dago, ezertan pentsatzen ari ez denaren itxura dauka. Badaki berehala «bun»-ak txigortzeko eta terako txilina jotzeko garaia izango dela.